Daha təcrübəli və peşəkar

Mütəxəssislərdən Konsultasiya

öz biznesinin inkişafı ilə maraqlanan korporativ müştərilərə faydalı olacaqdır.

Konsulting Xidmətləri

Peşəkar

Mühasibat Xidmətləri

ilə bütün hesabatları stolunuzun üstünə alın.

Mühasibat Xidmətləri

Şirkətinizin

Vergi Uçotu və Digər Hesabatlar

vaxtınızı alır? Dövlət orqanları qarşısında yaranmış icbari hesabatları autsorsinq edin.

Hasabatların Hazırlanması
Konsultasiya
01
Konsultasiya
Təcrübəli peşəkarların məsləhətləri
Daha Çox Öyrənin
Vaxta Qənaət
02
Vaxta Qənaət
Peşəkarlarla öz işinizin sürətini artırın
Daha Çox Öyrənin
Optimizasiya
03
Optimizasiya
Öz işinizə köklənməklə daha faydalı çalışın
Daha Çox Öyrənin
Gəlirləri Artırın
04
Gəlirləri Artırın
Düzgün əmək bölgüsü ilə xərclərinizi azaldın
Daha Çox Öyrənin
Xidmətlər

Vergi, Mühasibat və Konsaltinq Xidmətləri

Biz vergi və mühasibat uçotunun təşkili, idarə edilməsi üzrə bir sıra professional xidmətlər təklif edirik. Təcrübəmizə əsaslanaraq müştərinin fəaliyyət növü və həcminə uyğun olaraq səmərəli təkliflər irəli sürürük.
Vergi Uçotu Xidmətləri
Vergi uçotunun təşkili və başqa dövlət orqanları qarşısında yaranmış icbari ödənişlərlə bağlı problemləri həll edirik.
Daha çox öyrənin
Mühasibat Xidmətləri
Kiçik hesablamadan tutmuş çətin hesabatlara qədər hər növ mühasibat xidmətləri təklif edirik.
Daha çox öyrənin
Konsaltinq Xidmətləri
Biz dəyərli məsləhətlərimizlə öz biznesinin inkişaf etdirilməsində maraqlananlara yardımçı olmağa çalışırıq.
Daha çox öyrənin
Köməkçi Xidmətlər

Vaxtınız yoxdur? Eləysə bizə müraciət edin:

Fiziki və hüquqi şəxsin fəaliyyətinin bərpası, dayandırılması, təsis sənədlərində dəyişikliklər, obyektin uçota qoyulması, uçotdan çıxarılması, bank hesabının açılması, kassa aparatlarının qeydiyyatı, ƏDV qeydiyyatı, qeydiyyatın ləğvi və başqa nə qədər işiniz var? Biz Sizə kömək edərik.
Agent xidmətlərindən yararlanın
Köməkçinizə zəng edin: (051) 775-52-25
Nə Üçün Biz?

Artıq 12 ildən çoxdur ki, Sizin üçün çalışırıq!

2019-cu ildən yeni adla, 2022-dən yeni ünvanda fəaliyyətə başlasaq da, artıq hər zaman stabil və etibarlı tərəfdaş olduğumuzu sübut etmişik. Bizim işimizin nəticəsi Sizin uğurunuzdur. Əgər Siz qazanırsızsa, deməli "VM Consulting" MMC düzgün yoldadır.

35+

Daimi müştəri

65+

Əməkdaşlıq

600+

Uğurlu layihə

Bizim Bloq

Faydalı Məlumatlar

Qanunvericiliyə edilmiş dəyişikliklər və başqa faydalı məlumatlarla dolu məqalələr
Əli Allahverdov - VM Consulting MMC
Əli Allahverdov: Vergi dəyişikliklərini yalnız cərimə, artım və güzəşt kimi dəyərləndirmək olmaz

Vergi qanunvericiliyindəki yeniliklər sahibkarlar və işçilər üçün müxtəlif suallar yaradır. Bu dəyişikliklərə necə yanaşmaq lazımdır? Azərbaycan Müjdələrinin mövzu ilə bağlı suallarını vergi, mühasibat və audit sahələri üzrə konsaltinq xidmətləri göstərən “VM Consulting” MMC şirkətinin rəhbəri Əli Allahverdov cavablandırır.

— Əli müəllim, öncə sizinlə tanış olaq. Zəhmət olmasa, özünüz və peşəkar fəaliyyətinizlə bağlı danışın.

— Mən Əli Allahverdov, “VM Consulting” MMC-nin rəhbəriyəm. Azərbaycan Dövlət İqtisad Universitetində mühasibat uçotu və audit ixtisası üzrə bakalavr və magistr təhsili almışam. Peşəkar fəaliyyətim mühasibat, vergi və audit sahələri ilə bağlıdır.

İşimizdə əsas məqsədimiz sahibkarın maliyyə durumunu düzgün görməsinə və qərarlarını etibarlı məlumatlar əsasında verməsində kömək etməkdir. Düzgün uçot həm qanunvericiliyin tələbidir, həm də biznesin idarə olunması üçün önəmli vasitədir.

— “VM Consulting” hansı xidmətləri göstərir?

— Əsas fəaliyyət istiqamətlərimiz mühasibat və vergi uçotu, kadr uçotu və konsaltinq xidmətləridir. Mühasibat əməliyyatlarının uçotu, vergi hesablamaları və hesabatları, əməkhaqqının hesablanması və kadr sənədləşməsi üzrə müəssisələrə dəstək göstəririk. Xidmət istiqamətlərimizə audit, hüquqi dəstək və tədris də daxildir.

Bizim yanaşmamız hər müəssisənin fəaliyyətini və ehtiyaclarını ayrıca nəzərə almaqdır. Sahibkar hansı öhdəliklərinin olduğunu, hansı güzəştlərdən istifadə edə biləcəyini və hansı əməliyyatların risk yaratdığını aydın bilməlidir.

— Azərbaycanda yeni vergi güzəştləri və məsuliyyət tədbirləri gündəmə gəlir. Bu dəyişiklikləri necə dəyərləndirirsiniz?

— Azərbaycan iqtisadiyyatı sürətlə inkişaf edir. Eyni zamanda bütün dünyada iqtisadiyyat, texnologiyalar və biznes modelləri dəyişir. Yeni fəaliyyət sahələri, gəlir mənbələri və iş formaları yaranır. Bu proseslər qanunvericiliyin də yenilənməsinə zərurət yaradır.

Ancaq yeniliklərə yalnız “cərimə nə qədər artdı?” və ya “nə qədər güzəşt olacaq?” sualları ilə yanaşmaq yetərli deyil. Dəyişikliyin məqsədini, kimləri əhatə etdiyini və praktikada hansı nəticəni yaradacağını araşdırmaq gərəkdir.

Məsələn, güzəştin iqtisadiyyata əlavə fəaliyyət gətirib-gətirmədiyi, məsuliyyət tədbirinin isə pozuntuların qarşısını nə dərəcədə aldığı dəyərləndirilməlidir. Sahibkarın və işçinin üzərinə düşən yük də həmin təhlilin bir hissəsidir. Buna görə hər yeniliyə avtomatik müsbət və ya mənfi qiymət vermək düzgün olmaz.

— Konkret nümunə götürək: 2027-ci ildən əməkhaqqı üzrə gəlir vergisinin növbəti artımı nəzərdə tutulur. Bu, işçilər və sahibkarlar üçün nə deməkdir?

— Əvvəlcə əhatə dairəsini dəqiqləşdirək: söhbət neft-qaz sahəsində fəaliyyəti olmayan, qeyri-dövlət sektoruna aid işəgötürənlərdə çalışan şəxslərdən gedir.

2019-cu ildən tətbiq edilən yeddiillik güzəşt dövründən sonra 2026-cı ildən mərhələli vergitutmaya keçilib. Vergi tutulan aylıq gəlirin 2500 manatadək olan hissəsi üzrə dərəcə 2026-cı ildə 3 faiz, 2027-ci ildə 5 faiz, 2028-ci ildən isə 7 faizdir. Aylıq gəliri 2500 manatadək olan işçilər üçün 200 manatlıq azadolma da saxlanılır.

Məsələn, əsas iş yerində aylıq 1500 manat əməkhaqqı alan işçinin gəlir vergisi 2026-cı ildə 39 manat, 2027-ci ildə 65 manat, 2028-ci ildə isə 91 manat olur. Bunlar yalnız gəlir vergisi üzrə məbləğlərdir.

İşçinin gəlirindən tutulan məbləğin artması onun üçün real maliyyə təsiridir. Sahibkar baxımından isə əmək müqaviləsində razılaşdırılan maaşın şərtləri və əməkhaqqı büdcəsi nəzərdən keçirilməlidir. Dəyişikliklərin daha geniş nəticəsini dəyərləndirmək üçün məşğulluğa, əməkhaqlarının rəsmiləşdirilməsinə və biznesin xərclərinə təsiri də araşdırılmalıdır.

— Əli bəy, 2027-ci ildə fiziki və hüquqi şəxslər vergi hesabatları ilə bağlı nələrə diqqət etməlidirlər?

— İlk növbədə, hər bir vergi ödəyicisi öz fəaliyyətinə və vergitutma rejiminə uyğun hesabat öhdəliklərini dəqiqləşdirməlidir. Fiziki və hüquqi şəxslərin öhdəlikləri fərqlənə bilər. Uçotun düzgün aparılması, sənədlərin vaxtında hazırlanması və hesabatların müəyyən edilmiş müddətlərdə təqdim edilməsi əsas diqqət tələb edən məsələlərdir.

İlin başlanğıcından vergi sahəsində dəyişikliklər gözlənilir. Buna görə sahibkarlar həmin dəyişikliklərin onların fəaliyyətinə, vergi hesablamalarına və hesabatlarına necə təsir edəcəyini əvvəlcədən öyrənməlidirlər.

Bizim sosial şəbəkə səhifələrimizi və VMConsulting.az saytını izləyin. 2027-ci il üzrə qəbul edilən dəyişiklikləri, onların açıqlamalarını və praktik nümunələrini yayımlayacağıq. Məqsədimiz həm fiziki, həm də hüquqi şəxslərin yenilikləri vaxtında başa düşməsinə və düzgün tətbiq etməsinə kömək etməkdir.

Prezident İlham Əliyev VIII YAP Qurultayında
Prezident: Gələn il minimum əməkhaqqı, pensiyalar, sosial müavinətlər qaldırılacaq

Azərbaycanda gələn il minimum əməkhaqqının, pensiyaların və sosial müavinətlərin artırılması nəzərdə tutulur.

VM Consulting MMC xəbər verir ki, Prezident İlham Əliyev bu barədə oktyabrın 2-də Bakıda, Heydər Əliyev Mərkəzində keçirilən Yeni Azərbaycan Partiyasının (YAP) VIII Qurultayında çıxışı zamanı bildirib.

Dövlət başçısı bununla bağlı artıq göstəriş verildiyini açıqlayıb:

“Artıq göstəriş verildi, gələn il minimum əməkhaqqı qaldırılacaq, pensiyalar qaldırılacaq, sosial müavinətlər qaldırılacaq”.

Prezident bu istiqamətdə həyata keçirilən siyasətin əhalinin rifahının yüksəldilməsinə xidmət etdiyini vurğulayıb:

“Biz bu siyasəti müntəzəm aparırıq ki, Azərbaycan xalqının rifahı ildən-ilə yaxşılaşsın”.

İlham Əliyev sosial rifahın yaxşılaşdırılması üçün iqtisadi inkişafın vacibliyini də qeyd edib və Azərbaycanın ümumi iqtisadi potensialının kifayət qədər güclü olduğunu bildirib.

Mənbə: Azərbaycan Respublikası Prezidentinin rəsmi internet səhifəsi.

2027-ci ildə gəlir vergisi Maaşdan tutulacaq yeni məbləğlər
2027-ci ildə gəlir vergisi: Maaşdan tutulacaq yeni məbləğlər

2027-ci il yanvarın 1-dən neft-qaz sahəsində fəaliyyəti olmayan və qeyri-dövlət sektoruna aid işəgötürənlərdə çalışan fiziki şəxslərin muzdlu işdən əldə etdikləri gəlirlər üzrə gəlir vergisinin dərəcələri dəyişəcək.

Gəlir vergisi nədir? Gəlir vergisi fiziki şəxslərin əldə etdiyi müəyyən gəlirlərdən dövlət büdcəsinə ödənilən vergi növüdür. Əməkhaqqından tutulan gəlir vergisinin hesablanması isə şəxsin vergi tutulan aylıq gəlirinin məbləğindən asılıdır.

Azərbaycan Respublikasının Vergi Məcəlləsində nəzərdə tutulan mərhələli dəyişikliklərə uyğun olaraq, 2027-ci ildən gəlir vergisi üzrə yeni dərəcələr tətbiq olunacaq. İndi 2026-cı il üçün 2 500 manatadək vergi tutulan aylıq gəlirə 3 faiz dərəcə tətbiq edilir. 2027-ci ildən bu göstərici 5 faizə yüksələcək.

2027-ci ildən gəlir vergisi necə hesablanacaq?

2027-ci il yanvarın 1-dən başlayaraq 2028-ci il yanvarın 1-dək aşağıdakı dərəcələr tətbiq ediləcək:

Vergi tutulan aylıq gəlirGəlir vergisi
2 500 manatadək5%
2 500–8 000 manat125 manat + 2 500 manatdan yuxarı hissənin 10%-i
8 000 manatdan çox675 manat + 8 000 manatdan yuxarı hissənin 14%-i

Məsələn, vergi tutulan aylıq gəliri 2 000 manat olan şəxsin gəlir vergisi 100 manat təşkil edəcək. 3 000 manat vergi tutulan gəlir üçün isə hesablanma 125 manat + 2 500 manatdan yuxarı olan 500 manatın 10 faizi, yəni 175 manat olacaq.

Burada nəzərə alınmalı önəmli məqam budur ki, işçinin aylıq gəliri 2 500 manatadək olduqda həmin gəlirin 200 manatlıq hissəsinə tətbiq olunan gəlir vergisi güzəşti qüvvədə qalır.

8 000 manatdan yuxarı gəlirlər vergiyə necə cəlb olunacaq?

Aylıq vergi tutulan gəlir 8 000 manatdan çox olduqda gəlir vergisi 675 manat + 8 000 manatdan yuxarı olan hissənin 14 faizi əsasında hesablanacaq. Məsələn, vergi tutulan aylıq gəlir 10 000 manatdırsa, hesablanacaq gəlir vergisi 675 manat + 2 000 manatın 14 faizi, yəni 955 manat olacaq.

Vergi dərəcələri 2028-ci ildə də dəyişəcək

Dəyişiklik yalnız 2027-ci illə məhdudlaşmır. 2028-ci il yanvarın 1-dən başlayaraq 2 500 manatadək vergi tutulan aylıq gəlirlər üçün dərəcə 7 faizə yüksələcək. 2 500–8 000 manat aralığında gəlirlər üzrə vergi 175 manat + 2 500 manatdan yuxarı hissənin 10 faizi, 8 000 manatdan yuxarı gəlirlər üzrə isə 725 manat + 8 000 manatdan yuxarı hissənin 14 faizi olacaq.

Beləliklə, gəlir vergisinin dərəcələri mərhələli şəkildə dəyişir: 2026-cı ildə 2 500 manatadək vergi tutulan gəlirlər üçün 3 faiz, 2027-ci ildə 5 faiz, 2028-ci ildən isə 7 faiz tətbiq ediləcək.

Onu da vurğulayaq ki, bu qaydalar bütün əməkhaqqı alan şəxslərə eyni şəkildə şamil olunmur. Tətbiq dairəsi işəgötürənin fəaliyyət sahəsi və sektoruna, həmçinin Vergi Məcəlləsində müəyyən edilmiş başqa şərtlərə bağlıdır.

İşə gecikən işçinin maaşından kəsinti etmək: 4 Qanuni Yol
İşə gecikən işçinin maaşından kəsinti etmək: 4 Qanuni Yol

Bir çox işəgötürən intizamı qorumaq üçün gecikmələrə görə cərimə tətbiq etmək istəyir. Ancaq Əmək Məcəlləsinin tələblərini bilmədən edilən kəsintilər gələcəkdə böyük cərimələrə və məhkəmə çəkişmələrinə səbəb ola bilər.

Qanunvericilik çərçivəsində tətbiq edə biləcəyiniz 4 effektiv metodu təqdim edirik:

1. Yazılı Razılıq Metodu (Ən sadə yol)

Əmək Məcəlləsinin 175.1-ci maddəsinə əsasən, icbari kəsintilər istisna olmaqla, digər hallarda işçinin yazılı razılığı mütləqdir.

Necə tətbiq edilir? İşçidən “Gecikdiyim saatlara uyğun olaraq əməkhaqqımdan kəsinti edilməsinə razıyam” məzmunlu ərizə alınmaqla proses qanuniləşdirilir.

2. Kollektiv Müqavilə (Rəsmi cərimə)

Əgər müəssisənizdə kollektiv müqavilə varsa və orada intizam pozuntusuna görə cərimə nəzərdə tutulubsa, bu tam qanunidir (Maddə 186.2).

Məhdudiyyət: Cərimə məbləği aylıq maaşın 1/4-indən (25%) çox ola bilməz.

3. Mükafat (Bonus) Sistemi (Ən təhlükəsiz yol) 

Təcrübədə ən çox istifadə edilən və hüquqi baxımdan ən dayanıqlı modeldir. İşçinin maaşını “Sabit maaş + Aylıq mükafat” kimi müəyyən edirsiniz.

Mexanizm: Daxili qaydalarda “İşə gecikmə halında işçi həmin ayın bonusundan tam və ya qismən məhrum edilir” bəndi qeyd olunur. Beləliklə, siz maaşı kəsmirsiniz, sadəcə bonusu vermirsiniz.

Vacib: Sabit maaş hissəsi minimum əməkhaqqından aşağı olmamalıdır.

4. Vaxtamuzd Sistem (Tabel uçotu)

İşçini “saathesabı” ödəniş sisteminə keçirmək olar. Bu halda işçi işdə olmadığı saat üçün sadəcə qazanc əldə etmir.

Hüquqi tərəfi: Bu, əmək şəraitinin dəyişdirilməsi sayıldığı üçün işçi ilə mütləq qarşılıqlı razılıq əsasında əlavə saziş imzalanmalıdır (Maddə 43.4).

Nəticə: İntizamı bərpa etmək istəyərkən qanunu pozmayın. Metodlardan birini seçməzdən əvvəl əmək müqavilələrinizi və daxili intizam qaydalarınızı mütəxəssis yardımı ilə yenidən nəzərdən keçirin.

Bakı, Azərbaycan 2026
2026-cı ilin fevralında AR Əmək Məcəlləsinə edilmiş dəyişikliklər

Azərbaycan Respublikasının əmək qanunvericiliyi 2026-cı ilin fevral ayında önəmli yeniliklərlə təkmilləşdirilmişdir. Azərbaycan Respublikası Prezidentinin 24 fevral 2026-cı il tarixli fərmanı ilə Əmək Məcəlləsində dəyişiklik edilməsi haqqında qanun tətbiq olunmağa başlamışdır. Bu dəyişikliklər həm işəgötürənlərin öhdəliklərini, həm də işçilərin hüquqlarının müdafiəsini yeni müstəviyə daşıyır.

Fevral islahatları işəgötürənlər üçün nə deməkdir?

Yeni qanunvericilik aktları əmək münasibətlərinin rəqəmsallaşması və idarəetmənin optimallaşdırılmasını hədəfləyir. İşəgötürənlər üçün bu dəyişikliklər daxili intizam qaydalarının və əmək müqavilələrinin yenidən gözdən keçirilməsini zəruri edir. Qanunvericiliyin tələblərinə vaxtında uyğunlaşmamaq ciddi inzibati xətalar və maliyyə sanksiyaları ilə nəticələnə bilər.

Əmək qanunvericiliyindəki yeni tələblər barədə ən çox verilən suallar

İş dünyası üçün fevral ayında qəbul edilmiş qərarlar bir sıra suallar doğurur. Özəlliklə kadr uçotunun aparılması və hərbi çağırış dövründə işçilərin hüquqları diqqət mərkəzindədir.

İşəgötürənlər kadr sənədləşməsində nələrə diqqət etməlidir?

2026-cı ilin fevral islahatları əmək müqavilələrinin şərtlərinin və iş vaxtının uçotunun daha dəqiq aparılmasını tələb edir. Hər bir işəgötürən öz müəssisəsində kadr uçotu sistemini yeni fərmanların tələblərinə uyğunlaşdırmalıdır. Bu prosesdə hər hansı bir boşluq gələcəkdə əmək mübahisələrinə səbəb ola bilər.

Hərbi çağırış zamanı əmək münasibətləri necə tənzimlənir?

Mənbəyə görə, 2026-cı ilin aprel ayında növbəti hərbi çağırış nəzərdə tutulur. Bu, işəgötürənlərdən hərbi xidmətə yollanan işçilərin iş yerlərinin və vəzifələrinin saxlanılması ilə bağlı qanunvericilik tələblərinə ciddi əməl etməyi tələb edir. Fevral ayında imzalanan fərmanlar bu keçid dövrlərində sənədləşmənin düzgün aparılmasını daha da önəmli edir.

VM Consulting ilə kadr risklərinizi idarə edin

Əmək qanunvericiliyindəki sürətli dəyişikliklər fonunda müəssisələrin peşəkar dəstəyə ehtiyacı artır. “VM Consulting” MMC olaraq biz, müştərilərimizə yüksək səviyyəli kadr uçotu və HR audit xidmətləri təqdim edirik. Bizim xidmətlərimizə daxildir:

• Əmək müqavilələrinin yeni qanunvericiliyə (13 fevral 2026-cı il tarixli qanun daxil olmaqla) uyğunlaşdırılması.

• Kadr sənədləşməsinin auditi və mövcud risklərin aşkar edilməsi.

• Əmək Məcəlləsinin tələblərinə əsasən daxili intizam qaydalarının hazırlanması.

Peşəkar komandamız sizi qanunvericilikdəki ən son yeniliklərdən xəbərdar edir və biznesinizin hüquqi dayanıqlığını təmin edir.

Nəticə: Gələcəyə peşəkar addımlarla

2026-cı ilin fevral dəyişiklikləri Azərbaycanın əmək bazarında şəffaflığın artırılması üçün atılan önəmli addımdır. Sahibkar olaraq bu dəyişiklikləri düzgün tətbiq etmək həm nüfuzunuzu qoruyur, həm də biznesinizi cərimələrdən sığortalayır.

“Vergi & Mühasibat Consulting” MMC (VM Consulting) hər zaman yanınızdadır. Bizim ekspertlərimiz qanunvericilikdəki hər bir detalı sizin üçün təhlil edir və ən optimal həlləri təklif edir.

Bizimlə əlaqə saxlayın:

  • Ofis ünvanı: Bakı ş., Əhməd Rəcəbli küç., 1/25
  • Telefon/WhatsApp: (051) 775-52-25
  • E-poçt: [email protected]

VM Consulting – Siz rəhbərlik edirsiz, biz yerinə yetiririk!

Prezident İlham Əliyev
Prezident Vergi, Bank və Gömrük Qanunlarına Yeni Dəyişiklikləri Təsdiqlədi

Prezident İlham Əliyev Azərbaycan Respublikasının Vergi Məcəlləsində, “Banklar haqqında” və “Gömrük tarifi haqqında” Azərbaycan Respublikasının qanunlarında dəyişiklik edilməsi barədə Azərbaycan Respublikasının Qanununu təsdiqlədi.

2026-cı ildən etibarən Azərbaycan Respublikasının Vergi Məcəlləsinə və sosial sığorta qanunvericiliyinə edilən köklü dəyişikliklər vergi sisteminin şəffaflaşdırılması, kölgə iqtisadiyyatının azaldılması və büdcə dayanıqlığının artırılması məqsədi daşıyır.

Bu islahatlar iqtisadiyyatın demək olar ki, bütün sahələrini və vergi ödəyicilərinin hər bir kateqoriyasını əhatə edir. Gəlin dəyişikliklərin nədən ibarət olması ilə bağlı əsas məqamları aşağıda araşdıraq:

1. Muzdlu işçilər üçün Gəlir Vergisi və Məcburi Dövlət Sosial Sığorta (MDSS)

• Mərhələli keçid: Qeyri-neft-qaz özəl sektorunda çalışan və aylıq gəliri 2500 manata qədər olan şəxslər üçün gəlir vergisi dərəcəsi 2026-cı ildə 3% müəyyən edilir. Bu dərəcə 2027-ci ildə 5%-ə, 2028-ci ildə isə 7%-ə qaldırılacaqdır.

• Yeni MDSS dərəcələri: Gəliri 200 manatadək olanlar üçün işçidən 3%, işəgötürəndən 22% tutulur. 200–8000 manat arası gəlirlərdə işçidən 6 manat + 200 manatdan yuxarı hissənin 10%-i, işəgötürəndən isə 44 manat + 200 manatdan yuxarı hissənin 15%-i miqdarında sosial sığorta haqqı ödənilir.

2. Fərdi sahibkarlar üçün yeni sosial sığorta modeli

• Dövriyyəyə uyğun öhdəlik: Bütün fərdi sahibkarlar üçün MDSS haqqı dövriyyənin 2%-i miqdarında müəyyən edilir.

• Limitlər: Aylıq ödəniş minimum 60 manatdan (minimum əməkhaqqının 15%-i) az, 400 manatdan (minimum əməkhaqqının 1 misli) çox olmamalıdır.

• Sərbəst peşə sahibləri: Bərbər, dərzi, pinəçi kimi fəaliyyətlərlə məşğul olanlar minimum əməkhaqqının 5%-i (20 manat), toylarda xidmət göstərən aparıcı və musiqiçilər isə 8%-i (32 manat) miqdarında sabit MDSS ödəyəcəklər.

3. Aksiz vergiləri və rüsumlarda artımlar

• Mobil telefonlar: Şəxsi istifadə üçün gətirilən cihazlardan (təqvim ili boyunca 1 ədəd istisna olmaqla) hər ədəd üçün 20 manat aksiz tutulacaqdır.

• Köhnə avtomobillər: İstehsal tarixi 7 ildən artıq olan avtomobillərin idxalında yüksəldici əmsallar tətbiq edilir: benzin mühərriklər üçün 1,5, dizel mühərriklər üçün 2,0.

• Başqa mallar: Tütün məmulatları (siqaretlər 1000 ədəd üçün 55 manat), energetik içkilər (litri 3,3 manat) və alkoqollu içkilər üzrə aksiz dərəcələri artırılmışdır. Kvadrisikllər üçün mühərrik həcminin hər kubsantimetrinə görə 0,5 manat aksiz tətbiq edilir.

4. Xidmət sahələri və ƏDV güzəştləri

• İctimai iaşə: Nağdsız dövriyyəni təşviq etmək üçün POS-terminal vasitəsilə aparılan ödəmələrin 50%-i ƏDV tutulan dövriyyədən çıxılır. Həmçinin, bu sektor üçün sadələşdirilmiş vergi dərəcəsi nağdsız dövriyyə üzrə 8%-dən 6%-ə endirilir.

• “ƏDV geri al”: Bərbərxana, gözəllik salonu və kosmetoloji mərkəzlərdə göstərilən xidmətlər üzrə bu mexanizm yenidən tətbiq olunur.

• Yerli istehsal: Azərbaycanda istehsal olunan yük avtomobillərinin satışı və ehtiyat hissələrinin idxalı 7 il müddətinə ƏDV-dən azad edilir.

5. Naxçıvan Muxtar Respublikası üçün xüsusi rejim

• Naxçıvan rezidentləri üçün işğaldan azad edilmiş ərazilərlə eyni vergi rejimi tətbiq edilir. 2026-cı ildən başlayaraq 10 il müddətinə mənfəət, əmlak, torpaq və sadələşdirilmiş vergidən, habelə dividend gəlirləri üzrə vergidən azadolmalar nəzərdə tutulur.

6. Vergi nəzarəti və sanksiyaların sərtləşdirilməsi

• Qanunsuz sahibkarlıq: Vergi uçotuna alınmadan fəaliyyət göstərməyə görə maliyyə sanksiyası 5 dəfə artırılaraq 40 manatdan 200 manata qaldırılmışdır.

• Üfüqi monitorinq: Elektron audit ləğv edilir və yerinə iri/orta sahibkarlar üçün vergi orqanı ilə şəffaf əməkdaşlığa əsaslanan üfüqi monitorinq sistemi gətirilir.

• Kirayə gəlirləri: Fiziki şəxslərin yaşayış sahələrini kirayə verməsindən əldə olunan gəlir vergisi dərəcəsi 14%-dən 10%-ə endirilmişdir.

7. Başqa önəmli dəyişikliklər

• Yol vergisi: Benzin, dizel və maye qazın hər litri üçün 0,07 manat müəyyən edilmişdir.

• İcbari Tibbi Sığorta (İTS): Qeyri-formal işləyən şəxslər üçün aylıq 16 manat sığorta haqqı müəyyən edilmişdir.

• Pensiya yaşı: 2026-cı ildən etibarən kişi və qadınların pensiya yaşı bərabərləşdirilərək 65 yaş müəyyən olunur.

Bu geniş dəyişikliklər dövründə maliyyə risklərini düzgün idarə etmək üçün “VM Consulting” MMC-nin peşəkar vergi, mühasibat və konsaltinq xidmətlərindən yararlana bilərsiniz. Ekspertlərimiz qanunvericiliyin tələblərinə uyğunlaşmağınızda və cərimələrdən yayınmağınızda sizə tam dəstək olacaqlar.